“Оюу Толгой” ХХК-ийн Уул уурхайн ажилтны Үйлдвэрчний Эвлэлийн Хороо (ОТ УУАҮЭХ) нь байгуулагдсан цагаасаа хойш ажил олгогч талтай найм дахь удаагийн хамтын ажиллагааны гэрээг байгуулан ажиллаж байна. 

2025-2027 оны Хамтын гэрээг Ажил олгогч, ҮЭ-ийн Хороодууд хамтран байгуулж, Хамтын гэрээний хэрэгжилтийг дүгнэх хагас жилийн хамтарсан уулзалт өнгөрсөн сард болсон билээ. Бид гэрээний хэрэгжилтийн талаарх мэдээллийг нэгтгэн хүргэж байна.

НЭМЭГДЭЛ, НЭМЭГДЭЛ ХӨЛС, ТЭТГЭМЖ, УРАМШУУЛАЛ, ОЛГОВОРТОЙ ХОЛБООТОЙ ЗААЛТЫН ХЭРЭГЖИЛТ

Ажилтанд шууд мөнгөн хэлбэрээр олгох заалтуудаас онцлоход, 2025 оны гуравдугаар сарын 1-нээс нийт ажилтны үндсэн цалин 200 ам.доллараар нэмэгдэж, 23291 ажилтанд 10 төрлийн нэмэгдэл хөлс (давхардсан тоогоор), 4232 ажилтанд тэтгэврийн хуримтлал, удаан хугацаанд ажилласны урамшууллыг 202 ажилтанд тус тус олгожээ.   

ЧӨЛӨӨНИЙ ЗОХИЦУУЛАЛТ

2025 оны эхний таван сарын байдлаар нийт 6300 ажилтанд найман төрлийн чөлөө олгосон бөгөөд онцолбол, 225 ажилтан шинээр хүүхэдтэй болсон эцэгт олгох чөлөөг эдэлсэн байна. 

ЭРҮҮЛ МЭНД, ГЭНЭТИЙН ОСЛЫН ДААТГАЛ

2025 оны эхний таван сарын байдлаар 1976 ажилтан, гэр бүлийн гишүүний нөхөн төлбөрийн хүсэлт хүлээн авч, 1931 хүсэлтийг шийдвэрлэж хамруулсан.  

ТУРШЛАГА СУДЛАХ АЯЛАЛ

Оюу толгойн ажилтнуудыг урамшуулан, мэргэжлийн болон хувийн хөгжилд нь бодитой хувь нэмэр оруулах зорилготой Рио Тинто группийн дэлхийн тэргүүлэх уул уурхайн үйл ажиллагаатай танилцах боломжийг олгох, ажилтнуудын ур чадварыг нэмэгдүүлэх, инновацийг нэвтрүүлэх, хувь хүний өсөлт хөгжил, шинэ санаачилгыг дэмжихэд чиглэгддэг “Дэлхийн нүүдэлчид” аялалд 2025 онд 15 ажилтан хамрагдсаны 11 нь ҮЭХ-ны гишүүн байна. 

ДОТООДЫН ИХ ДЭЭД СУРГУУЛЬД СУРАЛЦАХ ТЭТГЭЛЭГ

2025-2027 оны хамтын гэрээний 5.4 заалтаар Ажилтнуудын хүүхдүүдэд зориулан 2025 онд 30 оюутанд тус тэтгэлгийг олгосон. 

ЦАГ БҮРТГЭЛ, ЦАЛИН БОДОЛТЫН СИСТЕМИЙН САЙЖРУУЛАЛТЫН АЖЛЫН ХЭСЭГ

Талууд хамтран уг сайжрууллалтын ажлыг хийх ба ажлын хүрээнд урт хугацааны чөлөөтэй үеийн цалин хөлсний бодолтыг нягтлан, сайжруулахаар хамтран ажиллах бөгөөд сайжруулалтыг 2025 оны  7 дугаар сарын цалин бодолтоос эхлэн хэрэгжүүлж байна.

ҮЙЛДВЭРЧНИЙ ЭВЛЭЛИЙН ХӨДӨЛМӨРЛӨХ ЭРХЭЭ ХАМГААЛАХ ӨДӨР

2025-2027 оны хамтын гэрээний 9.1 заалт: Жил бүрийн 6 дугаар сарын 13-ны өдрийг Хөдөлмөрлөх эрхээ хамгаалах өдөр болгон тэмдэглэх, “Оюу Толгой” ХХК-ийн Уул уурхайн Үйлдвэрчний эвлэлийн хороо 2024 оны үйл ажиллагаа, санхүүгийн тайлан мэдээллийг нийт гишүүдэд хүргэж, өдрийг уурхайн талбар дах “Зэрэглээ” кино театрт зохион байгууллаа. 

ХҮҮХДИЙН БАЯРЫН БЭЛЭГ

Хамтын гэрээний 5.11заалтын дагуу 16 болон түүнээс доош насны 9200 хүүхдэд бэлэг өгөв. 

Хамтын гэрээг ажил олгогч "Оюу Толгой” ХХК, "Оюу толгой” ХХК-ийн Уул уурхайн ажилтны үйлдвэрчний эвлэлийн хороо Монгол Улсын Хөдөлмөрийн тухай хууль болон холбогдох бусад хууль тогтоомжийг баримтлан, харилцан тохиролцсоны үндсэн дээр байгуулдаг.