Геологи, уул уурхай, хүнд үйлдвэрийн салбарын 2026-2027 оны Хамтын хэлэлцээрт санал авах уулзалт зөвлөгөөн өнөөдөр (2025.08.22) нийслэлийн Багануур дүүрэг, "Багануур" ХК дээр болж байна.

Хамтын хэлэлцээрт Монголын Эрчим Хүч, Геологи, Уул уурхайн Үйлдвэрчний Эвлэлийн Хорооны гишүүн байгууллагууд болох 20 гаруй анхан шатны Үйлдвэрчний Эвлэлийн Хороо (ҮЭХ)-ны дарга, төлөөлөгчид оролцож байна.

Тус зөвлөгөөнөөр салбарын гишүүдийн хөдөлмөрлөх эрх, түүнтэй холбоотой хууль ёсны эрх ашгийг хамгаалах, уурхайчдад тулгамдаж буй асуудлыг 3-талт хамтын хэлэлцээрт оруулахаар санал зөвлөлдөж байна.

Уулзалт, зөвлөгөөнөөс гарсан саналуудыг Монголын Эрчим Хүч, Геологи, Уул уурхайн Үйлдвэрчний Эвлэлийн Хорооны тэргүүлэгчдийн хурлын тогтоолоор томилогдсон хэлэлцээрийн төлөөлөгчид боловсруулж, Аж үйлдвэр, Эрдэс баялгийн яам болон Монголын уул уурхайн үндэсний ассоциацад хэлэлцээ хийх мэдэгдлийн хамт хүргүүлэх юм.

Хэлэлцээрийн төлөөлөгчид Монголын Эрчим Хүч, Геологи, Уул уурхайн ҮЭХ, “Бор-Өндөр” УБҮ, “Оюу Толгой” ХХК, “Багануур” ХК, “Дарханы төмөрлөгийн үйлдвэр”, “Шивээ-Овоо” ХК, “Геологи судалгаа шинжилгээний төв” ТӨҮГ зэрэг байгууллагуудын Үйлдвэрчний Эвлэлийн хорооны дарга нараас бүрдэж байна.